潮流興走塑, 香港唔少快餐店都開始實施走飲筒,務求減少啲對環境嘅污染,之前台灣更出咗一種用甘蔗渣造嘅飲筒,聲稱可以被大自然分解,比一般塑膠飲筒環保得多。不過原來呢種甘蔗飲筒無想象中咁環保,佢一樣會傷害到海洋生物!

有台灣部落格作者,早幾個月前將呢種聲稱可以被大自然分解嘅甘蔗飲筒埋係自己屋企後院嘅泥土入面,想睇吓甘蔗飲筒幾耐先會被分解。甘蔗飲筒喺土裡面經歷風吹雨打,埋咗近3個月先被作者挖出土,點知呢隻甘蔗飲筒唔單止無被分解嘅跡象,連用鏟敲都唔碎,非常頑強,同當初埋入泥個樣幾乎無分別,作者仲話佢嘅「硬度還是足以插死海龜」。原嚟呢種甘蔗飲筒除咗甘蔗渣之外,仲含有一種叫做PLA嘅生物塑料,PLA目前暫時仲未被列入可回收嘅物品裡面,要自然分解亦需要一個適合嘅環境先得,咁睇落,甘蔗飲筒都唔係比塑膠飲筒好好多。

呢位部落格作者最後呼籲大家,要真正保護環境,都係要減少使用飲筒同其他塑膠產品,同埋唔好亂拋垃圾,如果唔係呢啲垃圾無論可唔可以分解都係會直接傷害海洋生物。

圖:網絡圖片

#環保圈 #甘蔗飲筒 #PLA