嚟緊星期五「香港花卉展覽2019」開幕,而鄰近嘅佛山已經開始一場「花的盛宴」,當地禪城區羅南生態園中鮮艷嘅「禾雀花」綻放,趁住春天展現「美態」。原來呢種咁靚,形態活潑嘅花,背後有段故。



(圖:封面新聞)


(圖:封面新聞)


禾雀花因為外表似禾雀(即係我哋喺廟街見到用嚟叼籤文占卜嘅雀仔)而得名,呢個名背後仲有個同八仙之一鐵拐李有關嘅傳說。相傳明朝嗰陣,鐵拐李路過一塊農田,見到好多禾雀飛嚟偷食稻穀。農夫攞掃把驅趕,但禾雀飛嚟飛去,農夫趕極都趕唔走佢哋,傷心到喊起上嚟。鐵拐李決定幫個農夫,佢隨手扯下一條山藤,然後用法術將禾雀全部綁住,再一串串咁掛喺樹上,只准佢哋喺稻穀播種同收成之間嘅日子飛出嚟。從此,呢啲偷食嘅禾雀就變成咗禾雀花。



(圖:封面新聞)


禾雀花係一種季節性植物,每年三、四月先會開花。羅南生態園嘅生態長廊棚頂上掛滿一簇簇各色禾雀花,已經全部綻放,行近睇真係好似幾隻雀仔聚埋傾偈,所以禾雀花又被稱為「花中翠鳥」。唔似得其他花show off式盛放,禾雀花只會低調展現「美態」。佢開花嗰陣,花瓣會卷成翅狀,成個花體通透玲瓏。啱啱開時呈現乳白色或淡綠色,到開晒時就變成檸檬黃,再變為紫色、粉紅色或橙紅色。


(圖:封面新聞)


依家嚟羅南生態園,除咗欣賞禾雀花,仲可以摘番茄仔、木瓜、桑果等水果,感受春意盎然。


圖:封面新聞


#鐵拐李  #羅南生態園