今時今日,表達愛意嘅方式有好多種,送花、請食飯、寫卡、send message(如果仲有人堅持手寫情書,咁真係一股清流)等等。相信好多巴絲打都會選擇 send message 傳情,浪漫文字加心心 emoji,認真冧爆。不過大家要留意,啲心心 emoji 有唔同顏色,係有唔同意思嘅,千祈唔好貪 colourful 就亂 send 呀!


呢啲心心 emoji 有三類,唔同顏色唔同配搭,意思各異:


1. 單色一個心

❤️紅色:一路都係愛嘅象徵,表達激情同浪漫。

🧡橙色:友達以上,戀人未滿。

💛黃色:熱烈而純真嘅愛。

💚綠色:帶有妒忌心/佔有慾嘅愛情。

💙藍色:柏拉圖式愛情,流露住誠摯、忠心同友愛。

💜紫色:富有理解、同情嘅愛,表達關懷同愛護,適用於父母與子女之間嘅愛。

🖤黑色:內心嘅悲傷同陰暗面,或者係黑色幽默。


2. 粉紅系列

💕一大一細心心:彌漫喺空氣中嘅浪漫愛意。

💞旋轉心心:兩情相悅,想得到對方嘅心。

💓跳動心心:超級鍾意你,或者係愛情結晶品即將誕生。

💗成長心心:心越嚟越大,表達愛意越嚟越濃。

💖閃閃心心:溺愛、傾慕。

💘中箭心心:中咗愛神丘比特(Cupid)嘅箭,墜入愛河。

💝絲帶心心:我嘅愛係你嘅禮物。


3. 特別類型

💔破裂心心:失戀/傷心/悲痛。

❣️心形感嘆號:超級鍾意某個人/某種事物。

💟紫框白心:希望得到對方喜愛同關注。


圖:網絡


#愛情圈  #一片真心