我哋之前同大家報道過,有位的哥開爐日派咗封10蚊利是俾個客,後獲回贈500蚊大利是,開心到震!但唔係個個人收到大利是都會開心到飛起。近日有巴打收到老闆派嘅開工利是,入面足足有2000銀!係2000銀!真係2000銀!不過巴打一啲都開心唔起,仲開 post 問各路巴絲打「應否退還開工利是」?!


呢位巴打話,以往年年嘅開工利是都係派廿蚊(兩封加埋),所以今年老闆「飛躍進步」派2000蚊,而且得佢一個有,呢個情況「相當有可疑」。佢覺得呢封利是嘅真正主人係公司嘅一個「黃馬褂」,係老世派錯咗俾自己。


唔少網友都叫巴打「扮唔知」,話派到手就係自己嘅,2000銀「袋袋平安」。亦有人覺得成件事根本係一個局,老闆專登派封大利是俾巴打,試下佢係咪誠實好員工。當然都有人認為「誠實是美德」,巴打應該還利是。


咁巴打最後點做?巴打話「一早知走唔甩」,因為當時有收利是嘅人唔夠10個,老闆一定推斷到邊個食咗嚿「肥豬肉」。而老世真係首先開口問佢攞返封利是,巴打當然即刻還,「你可能覺得我廢,但自問真係無膽」。



圖:網絡


#誠實圈  #開爐  #開工利是