依家有唔少人鍾意飼養一啲特別嘅動物,例如蜥蜴、蟒蛇、巨龜等,但呢啲同內地雲南傣族人咪婆婆所養嘅「寵物」相比就真係小巫見大巫,因為婆婆養嘅係一隻屬於國家二級重點保護動物嘅亞洲黑熊!婆婆將隻黑熊當正自己仔咁飼養多年,可惜依家隻黑熊體重達150公斤,食量勁大,婆婆實在冇能力再養佢,於是報警求助,黑熊被送往西雙版納動物救護中心。


2012年,咪婆婆喺邊境地區趁墟,見到一個老撾(Laos)男子兜售一隻虛弱嘅黑熊 BB,婆婆擔心隻黑熊 BB 被其他人買咗之後會被宰殺,於是自己揞荷包用120蚊人民幣(約140港元)買咗呢隻身長約40厘米,體重近50公斤嘅黑熊 BB


婆婆一開始喺屋企院子放養黑熊 BB,以蜂蜜同牛奶米湯等餵食。之後黑熊長大,啲牙同啲爪越嚟越尖,為防止黑熊傷害村入面嘅小朋友,婆婆將黑熊轉放喺一個鐵籠入面養。黑熊每日要食兩包麵,同埋南瓜、香蕉等蔬果,身長體重分別增長至約1.8米同近150公斤,最後連個籠都就嚟住唔落,而70幾歲嘅婆婆餵食都變得吃力。婆婆覺得自己再冇精力養黑熊,於是打電話俾當地森林公安局求助送養。


警方接報後聯同當地野生動物收容救護中心去接收黑熊,中心專家話隻黑熊身體狀況良好,但由於長期人工飼養,已經冇晒野外生存能力,唯有將佢送到救護中心照顧。另外,根據內地法例,亞洲黑熊唔可以私自飼養。不過警方表示,考慮到婆婆買黑熊嗰陣主觀上並冇惡意,決定唔處罰婆婆。



圖:西雙版納州森林公安局


#亞洲黑熊