DSE將會喺聽日放榜,相信各位同學啲心情都十分緊張。可能唔少人都已經部署好升學策略,準備迎接大學嘅校園生活,但亦有人會選擇進入職場,開始為自己嘅未來打拼。而為咗幫助大家尋找工作機會,勞工處今年亦推出咗多個項目,為應屆嘅考生提供各方面嘅就業支援。


共覓新機遇招聘會

首先喺放榜當日,勞工處將會聯同工聯會職業再訓練中心喺旺角麥花臣場館內舉行大型招聘會。招聘會共有四十多間機構參加,合共提供超過1 800個職位空缺,當中約六成無需相關工作經驗,適合應屆畢業生申請。而除咗即場招聘外,現場亦會有攤位介紹培訓課程資訊。


展翅青見計劃

第二,勞工處將舉辦「展翅青見夏日招聘浪接浪」招聘活動,並於7月26日至8月26日期間舉行多次招聘日。屆時10間機構將提供約250個涵蓋不同類別嘅全職及兼職職位,當中職位涵括餐飲、零售、建材檢測及公共服務業等多個行業。


至於有意投身資訊科技、教育等行業的學生則可參加「電子教.學支援計劃」,獲聘者可免費入讀電子教學職前培訓課程,然後在學校擔任電子教學支援員,接受為期12個月的有薪在職培訓。而獲聘者只要於計劃下的在職培訓工作滿三個月或以上,便可獲發最高12,000元嘅留任津貼。


就業創前路

雖然受疫情影響,香港嘅就業市場在過去一年備受壓力,但勞工處仍搜羅咗大量適合中學畢業生申請嘅職位空缺。有關職缺上載至專題網頁「就業創前路」上,學生可以按個人志向申請不同職位。另外,該專題網頁會發布不同類型招聘會嘅資訊,大家可以收藏該網頁以便一站式瀏覽所有相關資訊。


除此之外,勞工處兩間位於旺角和葵芳的青年就業資源中心亦推出咗「職途快活人」系列活動,提供實用嘅培訓課程,以協助剛畢業嘅學生提升求職面試技巧,認識正確嘅工作價值觀,為投身職場做好準備。


圖片來源:勞工處