早前小編就為大家介紹咗書展入面嘅李小龍展,但其實其他展覽如「我們的快樂回憶 — 《兒童樂園》」一樣值得一睇,因為該展覽展出咗不同年代嘅《兒童樂園》、主編羅冠樵嘅畫作原稿以及相關精品,絕對可以喚起老一輩嘅兒時回憶。



《兒童樂園》於1953年創刊,係香港史上最長壽嘅兒童讀物,陪伴著唔少香港人成長。書刊內容涵蓋中國神話、世界童話、謎語、遊戲等,而當中嘅「播音台」、「小圓圓」乃至「叮噹」等專欄更是十分經典,相信各位6、70後一定有睇過。



除此之外,日本漫畫《多啦A夢》更係由《兒童樂園》主編張浚華引入到香港,當中「叮噹」、「大雄」、「靜宜」、「牙擦仔」同「技安」等角色名稱更沿用多年。值得一提嘅係,張浚華將會出席書展講座「紙墨情緣」,有興趣的讀者可前往香港書展網站了解更相關資訊或預留座位。