今年書展除咗有書睇之外,3樓展覽廳的「文藝廊」亦有3個展覽可以睇,分別係「不朽巨龍︰李小龍傳奇80載」、「我們的快樂回憶 — 《兒童樂園》」及「從心『書』發」。不過當中最具矚目嘅就梗係李小龍展啦,因為展覽由大會同李小龍會合辦,展出咗唔少珍貴嘅照片、剪報,以及收藏品,比大家懷念一下呢一位已經逝世近50年嘅武打巨星。


據李小龍太太憶述,李小龍鍾情閱讀,家中大收藏了二千多本唔同類型嘅書,內容大多涉及武術、哲學、行銷、人物傳記等範疇。而為了讓大眾了解一下呢位一代巨星嘅閱讀口味,李小龍會會長黃耀強就根據李小龍生前嘅書櫃書單,蒐羅了一批同一版本嘅書藉放到展覽中。



資深收藏家吳貴龍亦為今次展覽借出咗大量李小龍嘅劇照,包括《雷雨》、《富貴浮雲》、《孤星血淚》等李小龍小時候演出作品,以及一些李小龍嘅生活照。呢啲劇照、生活照都紀錄咗李小龍由童星變成巨星嘅歷程,可以話係十分珍貴。



其實展覽仲有唔少珍貴嘅展品,但小編喺呢度就唔逐一介紹,留返比大家去書展慢慢發掘啦。不過值得一提嘅係,除了展覽外,舉辦展覽的李小龍會亦有在書展開擺攤,以優惠價販賣一些優質或罕見嘅收藏級貨品,就例如《龍爭虎鬥》演員相集等。而所有貨品亦只供現場發售,不設預留,所以有興趣嘅讀者喺行完李小龍展後,不妨到該攤位行下。