第31屆書展已於昨日正式開幕,可能唔少讀者都對書展無太大興趣,但其實今屆書展連同「運動及消閒博覽」以及「零食世界」一同舉行,除咗有書睇之外,仲有得食有得玩,絕對滿足到唔係書迷嘅大家。



顧名思義「運動及消閒博覽」分為「運動」及「消閒」兩大部分。喺運動方面,大家唔單止可以喺「戶外體驗」買到戶外同運動用品外,更可以喺「運動大本營」、免費體驗一下高爾夫球、賽車、競技疊杯等多種新奇有趣嘅活動。當中有參展商更提供8部電競賽車模擬器比入場人士試玩同比賽,等大家可以親身感受一下賽車嘅刺激感。



而喺消閒方面,鍾意靜態活動嘅讀者就可到「手作市集」睇睇皮革產品、飾物,以及純天然嘅護膚產品等,或者到「攝影世界」參與免費嘅攝影教學工作坊,甚至「棋樂無窮」試玩唔同類型嘅桌上遊戲。



至於今年首度舉辦嘅「零食世界」亦十分精彩,首先喺「環球零食」就有賣各種來世界各地小食,例如:馬來西亞榴蓮麻、西班牙伊比利亞黑毛豬火腿、荷蘭芝士脆脆等。其次喺「懷舊零食」則有賣一啲本地自家製嘅零食,例如:小熊曲奇、冷磨黑芝麻醬卷、黑松露蝦籽花生等。




「運動及消閒博覽」同「零食世界」都喺五樓展館展館舉行,大家行完書展之後就可以搭電梯上去,無需額外購買門票。而大家亦可以喺任意三個展覽參觀,無需擔心離場後無得再入場。