身體上嘅殘缺從來唔會窒礙有心人嘅勤學上進!四川有位無臂男子彭超,自細因意外失去雙臂,佢之後苦練用腳嚟代替雙手生活,早前佢用腳嚟考試嘅相更喺網上流傳。近日,彭超如願收到同濟大學研究生嘅錄取通知,佢爸爸仲影低佢用腳拎住錄取通知書嘅喜悅一刻添。

彭超6歲嗰年因為被高壓電所傷,自此失去雙臂,不過佢後來喺父母嘅鼓勵下用腳嚟代替手生活,學習用腳寫字、洗面、洗衫煮飯等基本生活技能。經過彭超努力,佢已經可以完全用腳嚟生活、學習。2015年,彭超以優異成績考入四川大學法律系,其勵志事迹獲得關注。今年3月,佢參加同濟大學研究生覆試,考試當日,學校為佢準備咗2張木凳同一塊木板,方便彭超用腳去完成考試卷。學校考慮到佢用腳寫字需時較長,特地為佢加長30分鐘筆試時間,點知彭超最終同其他考生一樣,用同樣時間就完成試題。彭超用腳考試呢一幕更被影低,喺網上熱傳。

上個禮拜五(9號),彭超收到錄取通知書,佢熟練咁用腳打開通知書,開心讀出內容:「彭超同學,經校長批准,錄取你為同濟大學2021級專業學位碩士研究生。」佢表示,過去1年嘅付出終於有回報,打算讀完研究生後,準備繼續攻讀博士,家人對此亦十分支持。

圖:網上圖片