東京2020奧運會延期一年,終於要喺今個月23號揭幕,由於疫情關係,今屆奧運大家都無得親身到場觀賽,不過唔緊要,睇直播一樣可以支持香港運動員。康文署會喺轄下18區指定體育館設置「奧運直播區」播放奧運賽事節目,等市民一齊感受奧運氣氛,同時為出戰奧運嘅香港運動員打打氣。

喺7月23號奧運開幕日下晝5點,康文署會喺九龍公園體育館舉行「奧運直播區」啟動活動,屆時除咗有運動示範、同樂活動外,亦會有香港運動員分享運動知識。其他場地嘅「奧運直播區」亦會由當晚開始開放,之後所有「奧運直播區」喺7月24至8月8號期間嘅開放時間為上晝8點至夜晚11點,市民可以到場收睇奧運賽事同精華片段。

想睇賽事睇得更投入,可以先去康文署「寓樂頻道」入面嘅「運動教室101」了解各項運動嘅比賽規則、技巧。「運動教室101」已經上載咗一系列由本地精英運動員同專家親身講解嘅入門知識影片,包括網球、籃球、高爾夫球、羽毛球、排球、欖球、乒乓球、足球、游泳等奧運運動項目,運動員仲會喺影片入面示範埋各項運動嘅技巧添。喺奧運期間,劍擊、空手道等影片亦會陸續推出,大家對各項運動嘅認識多咗,睇奧運賽事就自然更有趣味喇。

圖:網上圖片