距離DSE放榜仲有11日,相信唔少同學都覺得好緊張。而為咗紓緩下大家嘅緊張情緒,小編日前就請嚟兩位彩虹邨天主教英文中學嘅同學仔 Sam 同埋 Jason,同大家分享一下自己依家嘅心情,同埋對未來升學嘅計劃,實行幫大家「圍爐取暖」一下。


Sam 同 Jason 都係學校入面少數修讀體育嘅學生,Sam 就鐘意游水、划艇、舉重,而 Jason 就鐘意田徑項目,兩人都係校際比賽嘅常客。可能你會覺得作為運動員嘅佢哋經常比賽,心理質素較好,就算面對放榜都唔會有太大嘅壓力。不過其實運動員都係人,面對放榜呢件大事又點會唔緊張呢?


面對放榜, Sam 就表示,雖然自己對成績有信心,但依然都有一定嘅擔憂。因為佢較注重自己嘅興趣關係,學科之間嘅成績會有好大差距。以校內嘅模擬試為例,強項如體育科可以攞到5,但弱項如英文同數學卻只攞到1。對於呢個情況, Sam其實都曾經擔心較弱嘅科目會影響自己嘅升學,而佢亦有反思過「專注興趣抑或平衡發展」嘅問題。不過既然結果已定,Sam都表示唯有向前看,如果成績真係未如理想,佢就會選擇Retake個別科目。


至於Jason,佢就表示自己嘅情況同 Sam 差不唔多,唯一嘅分別係佢對自己嘅成績無太大信心。Jason 指自己知自己事,自己英文科嘅成績唔太樂觀,而喺香港呢呢個注重英文嘅地方,英文差想升學就更難。不過如果最後成績真係未如理想,Jason 就表示自己唔會選擇Retake,田為佢想走出中學見識一下外面嘅世界,而佢亦做足心理準備自己要從基礎文憑(Foundation Diploma)或高級文憑 (Higher Diploma)慢慢讀上去。


雖然 Sam 同 Jason 對未來都有唔同嘅打算,但同樣修讀體育嘅佢哋就異口同聲地表示,自己最想修讀體育相關學科,而未來亦想成為一位教練,將自己喜愛嘅運動,以及永不放棄嘅價值觀傳授比學生。雖然未來仍然有漫漫長路,但小編就喺度祝 Sam 同 Jason ,以及各位同學最後可以考獲佳績,並實現到自己理想。