公眾人物嘅影響真係可以好大,因為粉絲們會紛紛效仿佢哋嘅行為。英國足球隊曼聯嘅前鋒Marcus Rashford喺疫情期間不忘行善,致力解決兒童糧食不足問題而獲頒授大英帝國員佐勳章(MBE)。而Marcus嘅一個9歲小球迷Jacob受偶像啟發,亦開始做善事,結果Marcus得知事件後慷慨贈Jacob一封簽名信同遊戲機,希望鼓勵小球迷繼續行善。

據外媒報道,Jacob熱愛足球,同時係英格蘭西北部兩支球隊嘅隊員。佢知道偶像Marcus同慈善機構「Fare Share」合作,希望解決貧窮兒童嘅飢餓問題,收集可食用嘅食物俾各大慈善組織派發,Jacob於是效法偶像,亦出一分力協助籌款,仲喺社交平台分享進度。

Marcus聽聞後聯絡Jacob嘅爸爸John Worthington,攞咗佢哋嘅地址,諗住俾Jacob一個驚喜。結果Jacob喺屋企門口發現Marcus嘅禮物後非常驚喜,興奮到紮紮跳。呢份禮物有一部新款遊戲機、一款遊戲仲有一封Marcus嘅簽名信,信入面提到「我們善良因為這是正確的事」,並為Jacob所做嘅善事感到驕傲。

圖:BBC