香港公立醫院醫護嘅工作雖然十分忙碌,但仍然唔影響佢哋服務市民嘅質素。有網民幾日前喺網上討論區發文,公開表揚將軍澳醫院急症室一位年輕男醫生,讚佢係個仁醫。話說網民媽媽早前被魚骨鯁親,就去附近嘅私家診所求醫,點知就遇到個無醫德嘅醫生,只係求其檢查下話無發現魚骨,開啲消炎止痛藥就算。幾日後,網民媽媽喉嚨依然感到痛楚,於是前往將軍澳醫院急症室求醫,遇到裏面一位年輕男醫生,佢唔單止安慰網民媽媽,更細心幫網民媽媽檢查、夾出魚骨。網民感恩遇上仁醫,仲預備寫致意咭俾醫院讚揚該男醫生。

網民喺親子王國討論區發文指,媽媽喺上個月尾食晚飯嗰陣因「食住魚尾睇電視吹水」,不慎鯁魚骨未能吐出,即刻往附近嘅私家診所求醫。不過,私家診所嘅醫生就敷衍了事,求其照兩下就話無發現魚骨。網民直指該名私家醫生「冇醫德」,媽媽明明可以清楚指出鯁骨位置,懇請醫生再檢查,但對方「求求其其話冇,就咁開啲消炎止痛藥,打發我媽,跟住就趕住收工」。

過咗3晚,網民媽媽仍間唔中感到喉嚨位置「突然之間針拮咁痛」,於是決定去將軍澳醫院急症室求診。當時網民媽媽雖然獲分流為最低級,但醫院嘅護士同助理嬸嬸們都好關心佢,仲一直「溫柔提醒佢觀察住,會唔會突然之間呼吸困難定點樣就要示意」。終於輪到網民媽媽,係一位好年輕嘅男醫生幫佢睇症。嗰位醫生好細心又安慰網民媽媽,叫佢唔使驚,仲用咗麻醉藥先開始檢查。呢位醫生叫網民媽媽瞓喺床度慢慢幫佢搵條魚骨,仲講定如果最後搵唔到,就寫紙俾佢去照胃鏡,令網民媽媽好放心。最後唔使兩分鐘,醫生就夾到條長又幼嘅魚骨出嚟,仲幽默咁問網民媽媽想唔想攞返屋企添!網民媽媽好感激仁醫嘅醫德,網民亦預備寫咭讚揚致意。

唔少網友讚好貼文,更分享個人經歷:「公立醫院無論邊一科都好多好醫生㗎。因為我家人出入醫院好多次,胸肺科、腸胃科,精神科等,真係八九成醫生都好有醫德同會關心人」、「做公立醫生真係好辛苦,留喺度又咁細心,真係好有使命感」。

圖:網上圖片