本地社企銀杏館自2019年年底起,就推出免費「福飯」以唔同形式派俾基層同露宿者,即使係疫情期間亦未間斷。上星期開始,銀杏館仲推出「銀杏流動車」派飯服務,為深水埗基層送暖。

銀杏館最近喺社交平台發文指,由上星期一起,推出「銀杏流動車(Gingko-Van)」派飯服務,每日下午將熱辣辣嘅「福飯」透過貨Van運送到深水埗免費派發。銀杏館表示,雖然當中遇到唔少困難,包括天氣、環境、人手、運輸及成本等因素,但總相信可能嘅解決方法比困難多。

喺過去一年,本港經濟受重挫,銀杏館可以堅持每日派福飯,將不可能變成可能,實有賴無數善長同熱心義工嘅支持。銀杏館感謝大家無私嘅付出,齊心為被社會忽略嘅一群送上愛心同關心。而最令銀杏館感動嘅,係原本一啲嚟拎免費飯盒嘅人嘅成長,佢哋由領飯者變成可以就業嘅製作飯盒者、裝飯裝湯派飯嘅員工,由原本失業、待業者變成捐獻福飯者。銀杏館表示派免費平安飯盒,唔止係派飯俾弱勢社群咁簡單!一個飯盒,仲會帶嚟一個個不可思議嘅生命轉化,令銀杏館體會到生命真係可以影響生命。

圖:FB@銀杏館