新冠肺炎打擊全球經濟,唔少人因此失業。美國有個58歲男人Jeff亦因疫情被解僱,佢囡囡Rebecca Mix知佢想去大型連鎖超市Costco度返工,於是喺社交平台分享爸爸呢個心願,估唔到最後Jeff真係夢想成真,做咗Costco員工!

Jeff喺舊年4月遭裁員,佢同Rebecca透露過自己屋企距離Costco只有15分鐘路程,且佢聽聞Costco員工福利好,所以想入Costso工作。Rebecca將爸爸嘅心願分享到社交平台,原本只係諗住有人睇到可以為爸爸提供一個工作機會。點知居然被Costco總裁W. Craig Jelinek無意中見到,仲發email俾幾間分店,指示相關人員俾Jeff一個面試機會。其中一間Costco嘅經理隨後私訊聯絡Rebecca,話Costco將會喺離Jeff屋企40分鐘嘅路程開分店,如果Jeff考慮喺唔同地點工作,佢好樂意協助。

不過Jeff喺電話面試咗2次之後就無下文,直到今個月15號Rebecca收到爸爸嘅訊息,入面係佢全新嘅Costco員工證相,Rebecca先知爸爸夢想成真,於是喺社交平台分享呢件喜事。佢認為人們喺經歷如惡夢般嘅疫情後,似乎很樂於上網分享歡愉片刻,而喺呢個艱難時期可以發生呢種美妙嘅事係一份難得嘅禮物,尤其係發生喺自己爸爸身上。

宜家係Costco兼職員工嘅Jeff話佢第一日放工、參觀店鋪嗰陣,有個麵包店員工隨口提到:「不知道他們什麼時候會雇用推特上那個傢伙。」Jeff開心回應:「我就是推特上那個傢伙。」

圖:Twitter@ mixbecca