好多人都想「上樓」,擁有屬於自己嘅私人空間,並為此打拼。不過內地山東南村嘅青年就無呢個煩惱,皆因當地嘅青年年滿22歲就會免費獲分派一層面積達120平方米(約1291平方呎)、三房兩廳、具備基本裝修嘅樓,真係令人羨慕妒忌恨!

位於山東臨沂巿嘅南村本嚟只係一條貧困村,不過自2006年村內一名企業家成立涉足旅遊度假、酒店餐飲、倉儲物流、房地產開發、建築安裝、物業管理、農業開發、飼料生產、文化傳媒、電子商務等領域嘅「廣匯集團」之後,呢個集團每年為南村帶來2000幾萬人民幣嘅租金收入。為咗令村民共享經濟成果,同埋幫助有意結婚嘅青年,南村於是喺2009年起舉辦青年分配樓房活動,活動至今已經送出超過200間新屋。呢啲獲分配嘅樓市值約80萬人民幣,有三房兩廳,同時設有儲物室、車位、天然氣設備同太陽能熱水器各一套,而廚房同廁所都有簡單裝修,完成驗收就可入住,認真筍!

除咗送樓之外,南村村民仲享有其他福利,包括每年底60歲以上人士可獲派7000蚊人民幣,60歲以下嘅每人都有4000蚊人民幣,全體居民每年更可免費享有一次身體檢查。

圖:中新社、網上圖片