狗狗除咗係人類最好嘅朋友,仲可以成為人類嘅「伴讀書僮」,有助學童嘅身心發展。香港大學社會工作及社會行政學系2018年起推出「童狗有話兒」,將「伴讀犬」融入課程,伴小學生讀書,並研究伴讀犬對小學生認知及社交情緒能力嘅成效。

「童狗有話兒」計劃為期3年,共來自11間學校、超過1200名小二及小三學生參與。課程分為6節,一般喺一個學期內完成,內容涵蓋唔同嘅社交情緒主題,包括朋友相處之道、解決問題方法、面對離別同失落等,並會响每節安排受訓嘅伴讀犬陪伴學生,學生亦會讀書畀伴讀犬聽。課程又輔以7本以真實狗狗經歷編撰嘅原創繪本作為教材,提升學生學習興趣。 

研究過程中,團隊透過聚焦小組同個案研究,及邀請九位來自唔同背景嘅學童進行訪談,初步研究結果顯示,將伴讀犬融入課程,有助提升學童嘅認知能力和同理心,並有效改善其過度活躍行為。

計劃响唔同層面都有不錯嘅成效。响個人方面,受訪學童表示伴讀犬令佢哋更為自律,更容易管理自己憤怒嘅情緒,並加強對生命嘅關懷。响家庭層面,部份家長覺得無論喺親子關係或孩子與兄弟姊妹嘅相處方面都有改善。受訪家長亦觀察到孩子變得更為他人著想,更願意照顧弟妹。學校方面,受訪老師認為計劃加強學童嘅學習意欲,同學關係有所改善,課堂學習氣氛亦較好。 

有參與計劃嘅學生表示,與伴讀犬閱讀環節可減低孤獨感,並能夠舒緩負面情緒。該學童表示,「當狗狗望著我時,我覺得佢會保護我,感到冇咁孤單,比較開心」。有參與學校表示,有學生以往好抗拒接觸狗,參與計劃後主動希望與伴讀犬散步,並從甚少踏足圖書館,變為上堂都偷睇書。 

領導計劃嘅港大社會工作及社會行政學系副教授及臨牀心理學家黃蔚澄表示,動物輔助人道教育係一個嶄新領域,業界對如何訂定教育模式嘅標準及實踐準則仍未有共識,但是次計劃成效令人鼓舞,團隊目前正爭取其他資助以延續計劃。

資料及圖片來源︰香港大學


「伴讀犬」的士黃。