人類通常會訓練邊境牧羊犬幫手牧羊,不過,英國一隻10歲嘅邊境牧羊犬Peggy就因為失聰,聽唔到主人發出嘅指令而被移交到英國愛護動物協會(RSPCA)。好彩,有位協會員工領養咗Peggy,更訓練佢睇手語,等佢可以重拾本職。

邊境牧羊犬靠聽主人吹口哨或簡潔指令嚟管理羊群,聽力對佢哋尤為重要。無故失聰嘅Peggy亦因此無辦法好似以前咁聽明主人指令而「失業」,被前主人送去RSPCA。好在,協會一位28歲動物福利經理Chloe Shorten就對Peggy一見鍾情,決心訓練佢重返農場放羊,做返本行。而Chloe嘅丈夫Jason咁啱係一名牧羊人,於是兩人特意設計咗多個手勢同肢體語言,等Peggy可以唔使依賴聽覺嚟放牧。呢啲專為Peggy而設嘅手勢包括:豎起大拇指表示讚賞、平伸手掌表示停低、拍膝蓋代表叫Peggy返嚟,揮手則係示意減速等。

Peggy宜家已經學識密切觀察Chloe夫婦嘅手勢,平日會同另外2隻邊境牧羊犬一齊管理羊群。Chloe好開心見到Peggy可以學習新事物,同佢哋一齊享受生活。

圖:RSPCA