新冠肺炎疫情持續,口罩已經變成生活必需品,唔同款式嘅口罩陸續推出,日本最近更有幾個大學生開發咗一款聲稱可以防飛沫嘅可食用「蜜瓜包口罩」。大家無睇錯,真係直接用食得嘅蜜瓜包放上塊面度當口罩用!正當大家都以為呢個產品純碎係玩笑嗰陣,佢居然真係推出市面發售,而訂單更加接到唔停手,據知6月份嘅存貨已經售罄!

日本一間叫「悟空のきもち THE LABO」嘅公司喺6月10號正式發售「蜜瓜包口罩」,口罩聲稱通過防飛沫嘅性能測試,仲可以一邊戴一邊食,其實外型就係一塊麵包再加兩條掛耳橡筋。呢款口罩由3個超鐘意麵包嘅大學生開發,佢哋嘅夢想係「可以一直聞著麵包的香氣」,於是有咗將麵包當口罩嘅念頭,最後佢哋竟然真係成功同著名蜜瓜包連鎖店「Melon de melon」合作,推出一套5個、價值1800日圓嘅「蜜瓜包口罩」。官方宣稱呢款口罩具3D立體設計,可以完美咁貼合口鼻,係「全世界讓人感到最幸福的口罩」。不過,官方最後都有溫馨提示各位顧客:「如果忍不住吃了口罩的內側,便會減低防飛沫的性能」,亦有廠商提醒買家使用後,唔好食外層部分。

呢款口罩一推出,即刻引來網民瘋狂討論,唔少人都留言批評:「無用,浪費食物」、「別拿食物來玩啊」、「口罩和食物,只能二選一吧?話時話,這個口罩不會令臉變得黏糊糊嗎?」

圖:Twitter@livedoornews、the-labo.com