近年政府積極推廣粵港澳大灣區,睇嚟唔少同學仔都畀呢個「一小時生活圈」吸引到,計劃返內地升學。 

中學文憑試(DSE)報考人數近年持續下跌,報讀內地院校DSE考生人數反而連升4年,係2012年首屆DSE以來新高。「內地高校招收香港中學文憑考試學生計劃」今年有4783DSE考生參加,比往年升近兩成。 

DSE考生仲可以循以上計劃,以DSE成績報讀內地高等院校,豁免參加內地聯招考試或個別院校嘅額外考試。另外,下學年有127間院校參與計劃,包括北京大學、清華大學、復旦大學等。 

負責計劃嘅中國教育留學交流(香港)中心表示,最多學生將廣州暨南大學列為第一個志願,其次係中山大學、廈門大學、復旦大學等。至於受歡迎課程類別,依次為經管金融類、工程類、醫學類、藝術體育類等。 

內地升學專家、香島專科學校校長羅永祥指,內地院校學費比較平,加上疫下學生難到海外升學,而內地院校過去一年已恢復面授課堂,增加內地升學吸引力。 

學友社學生輔導顧問吳寶城提醒,學生响內地所考取嘅部分專業資格,例如護士,回港後須再考試先可以執業。又說,本港非所有學生修讀數學延伸部分(即M1M2),部份學生數理基礎有別內地生,喺修讀數理相關大學學科時,本港學生可能會感到吃力;又指出內地學生讀書比較勤力,港生到當地升學初時或成績落後,有損自信,需要時間適應。 

圖片來源︰中華學社;文匯報