近日意大利拍賣行Art-Rite 以1.5萬歐元(約14萬港元)賣出了一件「無形雕塑」。由於呢件雕塑無實體,既睇唔到,亦摸唔到,所以購買者只會獲得一份由創作者簽名並蓋章嘅證書,去證明佢係雕塑嘅擁有者。而呢件事件亦因此引起各界關注,有網民更笑指呢個係現實版「國王的新衣」。


根據外媒報導,呢件雕塑名為「我是(Io Sono,英文譯作I am)」。雖然這件雕塑不以任何物質形式存在,但創作呢件雕塑嘅藝術家 Salvatore Garau 卻表示,雕塑嘅尺寸為152*152cm,並建議買家準備一個不受其他東西阻礙嘅空間嚟展示該雕塑。


對於呢件雕塑嘅創作理念, Garau就表示:「根據海森堡的不確定原理(uncertainty principle),空白只不過是一個充滿能量的空間,即使我們清空它,虛無仍有重量,因此虛無具有能量,可以凝聚並轉化為粒子,形成我們。」

「無形作品」以高價賣出引起網民熱議,當中有網民更留言笑道:「我家有相同的雕塑」、「我想以1萬億美元買這座雕塑,但會用無形的錢。您意下如何?」,似乎大家都唔係「聰明人」,睇唔到呢個「國王的新雕塑」。


圖片來源:網上圖片