內地高考啱啱結束,廣州連日來新增多宗新冠肺炎個案,究竟喺疫情下,廣州考生們點樣去考試呢?原來背後多得一班大巴、的士司機全副武裝咁接送考生。

廣州對於中風險區、高風險區嘅考生,採用咗「一對一」、「點對點」嘅專車服務方式接送。居住喺隔離酒店嘅次密切接觸考生,廣州公交集團二汽公司會用大巴集中「點對點」接送,高考首日,呢批大巴已經接送咗95名考生去唔同考場。

而屬於高風險區嘅考生更有的士直接「一對一」送去考場。今年三月,廣州首支女性愛心的士車隊「紅棉車隊」成立,佢哋嘅的士前蓋貼有「紅棉」標記,為老人、小朋友等團體提供志願服務。今次高考,佢哋車隊亦有參與接送,一朝早佢哋就著上保護衣,出發接載考生到場,等到考試結束,佢哋又要提早到場接考生返屋企。其中一位司機陳蘭香更因擔心自己食飯會耽誤送考,就自備乾糧頂住肚先,佢表示自己都係母親,一對仔女今年都喺梅州參加高考,今次特殊送考,亦係為遠方嘅仔女加油。的士司機謝任芳為咗停喺一個靠近考場嘅車位,方便考生上車,更加提早兩個鐘到達考場。

喺大熱天時著住保護衣,一班司機入面件衫幾乎濕曬,而每日送完考生返屋企,又要去消毒點全身消毒先返屋企。考生們為咗感謝司機們嘅辛勞付出,紛紛寫感謝信、畫感謝畫送俾司機,多謝佢哋安全、準時接送,令自己可以順利高考。

圖:金羊網