每逢夏天,總有唔少遇溺個案發生。廣東汕頭一位漁具店老闆,因為曾目睹多次遇溺意外,所以拒絕賣漁具俾學生,為嘅就係唔希望學生接近水源,釀成意外。

近日網上流傳一段閉路電視影片,喺汕頭一間漁具店入面,有個著住校服嘅學生入店買釣具,想請老闆推薦下。老闆唔應佢,反問佢係咪初中生,然後話:「學生不賣,我不賣給學生」。學生被拒絕後仍然唔捨得離開店鋪,但老闆堅持唔賣,仲趕走佢。之後有傳媒採訪老闆,老闆解釋指:「我主要是不希望他們接近水源,因為之前這一類的事,我親眼看到過太多次了,就是真的不忍心」,所以除非有家長陪同,否則堅決唔賣釣具俾中小學生。佢更希望同行都可以同佢一齊實行,減少溺水事故。

網民紛紛稱讚老闆嘅做法,認為佢為咗保護學生嘅安全,寧願自己做少啲生意、賺少啲錢,係良心老闆。

圖:網上圖片