紙飛機相信大家都識得摺,不過要紙飛機飛得高、飛得遠就一啲都唔簡單。日本東京工業大學一個網名叫terurunchan嘅學生因為選修咗工學通識課程,喺學期末必須要參加一項紙飛機比賽,但佢摺嚟摺去都摺唔好紙飛機,索性將紙揸成一嚿紙團參賽,最後竟獲得第3名。terurunchan將呢件事分享到社交平台,估唔到引嚟同一個比賽中獲得第一名嘅網友回應:「沒想到還有人跟他有同樣的想法」!

terurunchan喺社交平台分享呢次紙飛機參賽經歷,比賽規定紙飛機只能用2張A3紙、膠水同20個以內嘅萬字夾完成,而且唔能夠用外力發射器,評分標準係飛行嘅時間同距離。由於terurunchan點摺都摺唔出滿意嘅紙飛機,於是佢決定用紙團參賽,事先亦詢問過老師嘅意見。最後terurunchan意外咁獲得第三名,佢亦因此笑稱將紙揉成一團丟出去就能拿到獎狀。但最令人估唔到嘅係,同一個比賽嘅第一名見到佢嘅分享,大感英雄所見略同,曬出自己嘅獎狀同埋喺比賽中用過嘅紙團。

好多網友紛紛留言表示:「奇蹟發生了」、「有夠厲害的思考轉換啊」、「這樣空氣阻力最小」。不過terurunchan指,今年可能仲可以靠紙團獲獎,但呢個方法曝光之後,出年可能就行唔通。

圖:twitter@terurunchan, bu_iiiiin