雖然宜家多咗好多共融設施幫助聾啞人士融入社會生活,但聾啞人士喺接受法律援助方面依然有困難。內地有位失聰女子譚婷就花咗比常人好幾倍嘅努力,由法律助理成為全國首名聾人律師,為聾啞人士普及法律知識,幫助佢哋得到法律援助。

譚婷8歲嗰年,患上神經性中耳中毒,喪失聽力,加上當時並無專門為特殊需要而設嘅學校就讀,譚婷被逼輟學。直至譚婷13歲,佢終於有機會喺特殊學校就讀,但已經5年無讀書嘅佢要跟上進度絕對唔容易。不過,譚婷無放棄,用盡所有時間嚟讀書。皇天不負有心人,譚婷唔單止跟上同齡人嘅學習進度,最後更加升讀到重慶師範大學。

2017年譚婷大學畢業之後,喺求職網站發現一則聾人法律助理嘅招聘廣告,自此踏上法律之途,更憑藉佢嘅努力,成功通過考試,成為全國第一位聾人律師。譚婷憶述,有一次300多名聾人到訪事務所,但當時只有一名律師識手語,而好多機構提供俾聾人嘅手語通常係標準手語,或用普通話翻譯嘅手語,同聾人日常用嘅手語相差甚遠,嚴重阻礙咗溝通,譚婷亦因次下決心成為律師,為聾啞人士發聲。而為咗更好咁溝通,譚婷除咗學習唔同嘅手語表達,更重新嘗試開口講嘢。

譚婷宜家除咗每日為聾啞人士提供法律意見、提供司法援助外,仲會拍片向聾人宣傳法律知識,上個月更喺中國殘疾人聯會舉辦嘅座談會上代表聾人發言。

圖:網上圖片