大家以前到公共圖書館借書要帶備借書證或者身分證,依家竟然唔再需要,人到就可以?!

康文署代表喺61日於東區區議會講述西灣河鯉景道綜合大樓圖書館內部設計,表示該館全面應用無線射頻識別技術(RFID),目標係爭取未來無人化操作,「拎住本書行出去就借咗本書」,亦會增設親子及休閒閱讀區、育嬰間等優化設施便利巿民。

該大樓現時正動工中,最快2024年啟用,有機會成為港島最新最大嘅分區圖書館。東區圖書館代表表示,大樓去年底開始動工,當中圖書館部分有四層,面積約3,000平方米,屆時會設有多元功能性空間,而藏書仲會多達14萬項,包括成人與兒童類中英文藏書、視聽資料及電子資源,以配合東區街坊唔同嘅需求。 

東區圖書館代表又指,該館將會係一所RFID智慧型圖書館,會設有自助智能還書機及領取預約資料嘅自助服務櫃位,有關櫃位會設响圖書館門外,可以全天候24小時使用。 

根據民政事務局向立法會提交嘅資料顯示,西灣河鯉景道綜合大樓除咗設有圖書館外,仲會有安老院舍部分,屆時會提供200個宿位。 

圖片來源︰立法會民政事務委員會