一到夏天又係蚊蟲活躍嘅季節,戶外活動一定要用驅蚊蟲產品。日本有位網民就買咗樣外形獨特嘅「驅蚊神器」,無任何化學成分,只需要佩戴喺身上,就可以「嚇走」蚊蟲。網民親測非常有效,當佢將呢件神器擺上網分享之後,更引嚟網友嘅熱烈討論添。

網民kamata4510471喺社交平台表示,因為自己經常喺溪邊釣魚,所以成日被蚊咬。有一次,佢去賣釣魚用品嘅店鋪買嘢嗰陣,意外發現一款聲稱可以嚇走蚊蟲嘅蜻蜓扣針,佢半信半疑咁買咗,之後著住短衫短褲、戴住呢個蜻蜓扣針去釣魚,點知真係成日都無被蚊針,佢驚訝發文表示:「這真的很有效」。網友紛紛留言:「好可愛我要買!!!」、「這真的好用嗎?我也想買」、「想買給孩子,但外觀看起來有點可怕XD」、「哈哈戴上後可能不只能驅蟲,連人都不敢接近了」。

呢款扣針係模仿蜻蜓界嘅巨無霸「無霸勾蜓」嚟設計,無霸勾蜓有綠色嘅巨大複眼,全身呈黑黃色環帶,體長可達115mm,堪稱為蜻蜓界嘅「巨無霸」。加上佢哋平時以昆蟲為食,一旦找到獵物,就會以迅雷不及掩耳嘅速度快速捕食,可以話係昆蟲嘅天敵。可能因為無霸勾蜓兇猛嘅捕食習性,令好多昆蟲都避之則吉,所以就算係假嘅無霸勾蜓都可以保護網民免受蚊蟲侵擾。

圖:Twitter@kamata4510471