依家啲中學生越來越有諗頭!創科教育原來不單止可以學整機械人,仲可以應用喺動物保育,人類文明同自然共融!

海洋公園早前舉辦「STEAM學生大賽」,由中學生設計創新嘅解決方案,化為公園內嘅設施。中華基金中學學生團隊為公園新寵兒小狐獴,設計增加其覓食能力嘅裝置,早前响園內啟用。 

去年獲獎嘅中華基金中學學生團隊,其設計嘅「狐獴豐容物」就獲得海洋公園垂青,變為實物。該創作高1.5米,闊1.2米,透過編程設計感應器,當狐獴走過,揚聲器就會自動播放狐獴叫聲,吸引佢哋到裝置,藉此訓練佢哋嘅手力同肌肉,同時又可以訓練其平衡力、解難同思考能力。

經過大半年時間,搜尋資料、設計、按園方提供嘅安全指引改良組裝,「狐獴豐容物」現時放置响「小狐獴與大象龜之旅」內。

今屆(海洋公園STEAM學生大賽2021)比賽吸引咗五十間中學報名,其中奪冠嘅玫瑰崗中學設計「蝴蝶友善花園360」,以及禮賢會彭學高紀念中學「人工珊瑚架」,前者混有釋放花香山嘅真假植物;後者則讓珊瑚依附生長。日後呢兩個設計將分別放置園內「自然生態徑」及「海洋奇觀」觸摸池。 

圖片來源︰海洋公園


「狐獴豐容物」實物,學生見到狐獴反應踴躍,感到滿足。