連體嬰出生嘅機率極低,美國一對連體嬰姊妹Abby and Brittany Hensel出生嗰陣被醫生診斷佢哋活唔耐,不過佢哋今年已經21歲喇,仲做埋小學老師添。

據美媒報道,Hensel姊妹有2個頭,頭以下嘅身體係連體。雖然佢哋共用一個身體,但佢哋體內有各自嘅器官,包括獨立嘅心、胃、脊柱同脊髓。佢哋嘅胸部比正常人寬,出世嗰陣切咗1隻生喺背部肩胛骨嘅手臂,剩返2隻手同2隻腿。姊妹二人各自控制1隻手同1隻腳,所以跑步、游水等運動時要互相協調先能夠完成。

Hensel姊妹雖然共用一個身體,但佢哋擁有兩個獨立嘅頭腦,所以佢哋擅長嘅嘢亦唔同。考試嗰陣,Hensel姊妹會各自控制1隻手,完成2份考卷。姊姊Abby數學叻,而妹妹Brittany就擅長寫作,所以兩姊妹喺求學時期各科成績都唔同。宜家兩姊妹喺一間小學擔任老師,收2份獨立嘅人工。

有網友表示自己曾見過Hensel姊妹,佢形容Hensel姊妹非常友善,佢哋講嘢嗰陣一唱一和,仲可以用雙手同時發短訊:「一個人控制左邊,一個人控制右邊,非常和諧,太瘋狂了。」

圖:IG@abbyandbrittany