今年嘅DSE終於告一段落,考生們可以抖一抖靜待放榜。唔止香港嘅考生為求入心儀大學而努力,日本考生亦如此。日本有一間便當店嘅店長為咗激勵考生,以各大大學嘅名嚟命名便當,祝考生們都能夠金榜題名。 

據日媒報道,東京代代木一帶有一間名叫「しょうが亭」嘅便當店,菜單上嘅便當全部都以日本知名大學所命名,例如「東京大學」、「明治大學」、「慶應大學」等等。店長表示,以前代代木係有名嘅補習區,四周有好多知名補習社,令考生們喺呢區匯聚。為咗激勵呢啲學生考到理想大學,同埋舒緩佢哋嘅考試壓力,店長就諗到用大學名來命名便當,點知一做就做咗40年。

啱開始嗰陣,店長本來只係將東京大學、應慶大學等「東京六大學」放進入菜單中,但後來慢慢有客人要求「希望也有某某大學的便當」,於是菜單上嘅大學就越來越多。宜家唔單止係想求考運嘅學生嚟幫襯呢啲「大學便當」,就連呢啲名校嘅校友都會嚟試下以自己母校命名嘅便當。

網友們大感有趣,留言表示:「我以為是可以外帶整間大學」、「醫學部是哪個大學啊」、「看起來都滿好吃的」、「我想要唸薑燒豬肉大學」。

圖:monosus.co.jp、網上圖片