近排啲天氣熱辣辣,每日平均氣溫都成30幾度,熱到只想留喺室內嘆冷氣,但外賣員/速遞員就無得揀,要長期喺戶外工作。九龍灣有間窩心餐廳,特登準備一箱冰涼飲品免費俾外賣員享用,避免佢哋中暑,網友們紛紛大讚該餐廳,同行嘅外賣員亦留言感謝餐廳可以尊重佢哋!

有外賣員網民喺facebook群組「(香港)送餐/送貨員意見交流區」上載照片,指九龍灣淘大商場一間餐廳,喺門口放咗個保溫箱,入面裝滿樽裝水同罐裝飲品,仲喺箱蓋貼上紙條:「外賣哥哥/姐姐可自行拎水飲!辛苦晒你哋!」網民感動表示:「有啲餐廳對待啲外賣仔幾好,知道天氣熱驚我哋中暑,放啲飲品叫我哋自己隨便攞」。

呢張相吸引唔少網友大讚,留言指:「飲嘢事少,多少能拾回一點外賣仔尊嚴事大」、「派水其次,餐廳會理解/體諒我地先係最窩心」,亦有唔少外賣員分享自己嘅類似經歷:「深水埗有一間雪山冰廳都會比佢地既奶茶比車手」、「有次天人姐姐仔請我飲珍珠奶茶添」。不過,有網民擔心餐廳嘅善心會被濫用:「轉頭比人成箱拎走佢都似」、「問題係好多唔係送外賣廢老又走去攞」。

圖:FB@(香港)送餐/送貨員意見交流區