有一名年輕人即使「千瘡百孔」,都歇盡所能燃亮他人生命,咁強大嘅心理令人由衷佩服!

呢名年輕人名叫好鈞,今年27歲,就讀樹仁大學輔導及心理學系,獲教協頒發司徒華獎。好鈞係第一屆DSE考生,豈料備試時因發燒及出紅斑入院,確診系統性紅斑狼瘡,不經不覺與紅斑狼瘡症已共處九年。

紅斑狼瘡症伴隨多個併發症,好鈞曾受腎炎、肺血管栓塞、腦抽筋等困擾,更患上每一百萬人中只有約1人罹患嘅罕見腦神經病僵硬人症候群(Stiff Person Syndrome),導致佢需要用拐杖走路,身上掛着尿袋。好鈞目前病情穩定,但每日仍須服用20多種藥物及打薄血針。 

儘管如此,亦無阻佢成為家裡第一個大學生嘅決心,經過3DSE,佢終於喺2016年如願以償考入大學,今年畢業。6年前,熱愛畫畫嘅佢喺病塌上,將自身嘅患病經歷創作成一幅幅插畫,上載到Facebook社群「我的戰友是狼先生」,記錄「狼先生」同自己嘅故事,2018年更集結成繪本出版,盼能破解大眾對紅斑狼瘡嘅誤解,及勉勵患病嘅朋友,發放正能量。 

好鈞形容,狼先生於插畫中係一個「開心角色」,係一位戰友。好鈞從不認為紅斑狼瘡症可怕,認為呢個病既然不可擺脫,不如視為朋友。對於未來,好鈞畢業後想成為輔導員,繼續幫助更多病友,為患者重整心情。 

圖片來源︰FB@我的戰友是狼先生