聽障人士之間通常用手語溝通,不過普通人如果要同聽障人士溝通又唔識手語可以點做?香港專業教育學院(IVE)軟件工程高級文憑嘅三位學生溫子軒、吳依澄、陳毅展,就設計咗一個名為「SignChat」嘅手語翻譯應用程式,呢個APP透過人工智能同深度學習做分析同訓練,令系統學習手語,並將手語轉化成有意思、合邏輯嘅句子,促進健聽同聽障人士嘅溝通。

IVE軟件工程高級文憑畢業生溫子軒係呢個APP嘅開發者之一,佢曾喺小學接觸過手語,亦有參加過手語合唱團,一直覺得手語十分有趣,於是同吳依澄、陳毅展一齊構思咗「SignChat」呢個畢業作品。溫子軒表示,「SignChat」分為兩個應用程式,一個負責訓練AI學習手語,一個負責翻譯手語。SignChat先透過深度學習訓練AI系統辨認唔同手語嘅意思,之後配合立體影像追蹤技術,等AI辨識雙手動作,最後透過自然語言處理技術,配合手語文法,翻譯成有意思、合邏輯嘅句子,翻譯嘅準確率更高達8成。溫子軒認為,研發SignChat最大嘅難處係訓練AI嘅學習能力,手勢如果方向有誤差或舉錯手指都會影響AI嘅辨認。

宜家SignChat已可辨認約50個簡單詞語同句子,IVE團隊期望喺今年內可豐富手語資料庫,增加可辨識嘅字詞至100個,亦希望SignChat日後可廣泛應用。

圖:文匯