疫情期間,戴口罩已經變成我哋嘅日常習慣,但對於需要靠面部表情、口型嚟溝通嘅聽障人士嚟講,口罩就阻礙咗佢哋嘅日常交流。嶺南大學「嶺大創業行動」獲香港聾人福利促進會(聾福會)邀請,設計出一款防護規格達到ASTM Level 3標準嘅全透明過濾口罩,其全透明同不反光嘅設計可以令聽障人士安全、清楚咁見到對方嘅面部表情,方便溝通。

領導是次計劃嘅嶺大創業行動總監高永賢博士表示,市面上唔少全透明口罩都唔符合防疫規格,而有病毒過濾功能嘅半透明口罩又有嚴重反光、霧氣同透明部分太細等問題。而嶺大設計嘅全透明過濾口罩嘅靈感源自隱形戰機,口罩結合多邊形平面視窗同低棱角表面嘅設計折射燈光,大大減少反光問題。口罩全透明嘅設計,可以清楚見到佩戴者嘅口型同表情,加上口罩邊緣以柔軟物料製成,緊貼面型,就算講嘢嗰陣口罩亦唔會輕易移位。

高博士又指,嶺大嘅全透明過濾口罩正下方位置設有H13 HEPA 高效顆粒空氣過濾網,可過濾99.95%病毒,達到ASTM Level 3標準,又比一般外科口罩更透氣。口罩外殼採用抗病毒鍍膜,可提供長達8個月嘅抗病毒保護,而口罩內層也具備持久抗霧功能。呢款全透明口罩仲可以重複使用,只需每兩星期更換H13 HEPA 濾網,以及每日用70%酒精直接清潔外殼即可,方便衛生。設計團隊期望日後可以獲得捐助,大量生產該全透明過濾口罩,將其普及化,並幫助有需要人士,亦可以推展至其他特別職業需要嘅人士,如:教師、手語傳譯員、言語治療師、服務業從業員等。

聾福會期望透過今次同嶺南大學合作,為聽障人士提供可同時兼顧可見度同過濾病毒功能嘅全透明口罩,並藉此機會呼籲政府部門、公營機構、大型服務業提供者,主動為前線工作人員提供防疫功能嘅全透明口罩,協助聽障人士讀唇,達至無障礙溝通,保障聽障人士擁有公平獲取資訊嘅權利。

圖:嶺南大學