上海崇明一對姊弟喺屋企附近放狗嗰陣,無意中發現一個被人棄置嘅舊床頭櫃入面,竟然收埋26萬人民幣(約港幣31.4萬)。但佢哋並無心生貪念,而係報警交俾警方處理。

5月1號上晝,就讀小學5年級嘅張曉曦同細佬張梓晨喺屋企附近嘅籃球場帶狗狗散步嗰陣,狗狗一頭撞上一個丟棄喺路邊多日嘅舊床頭櫃。姊弟二人聽到櫃入面發出聲響,就好奇打開櫃門查看,點知被佢哋發現一個用牛皮紙同信封層層包住嘅大量百元大鈔,二人大為緊張,即刻話俾媽媽知,想媽媽幫手報警。媽媽以為小朋友講大話,又以為嗰啲只係陰司紙,起初並唔信。張曉曦諗到失主宜家一定心急如焚,於是決定親自守喺失物隔離,等細佬拎住其中一疊錢俾媽媽睇,媽媽隨後報警求助。

警方現場點算後確認,20幾個信封入面嘅現金全部係真鈔,暫時未搵到失主。據悉姊弟一家來自安徽,父母喺崇明經營小生意,家境並唔太富裕,今次佢哋能夠拾金不昧,實在難得。

圖:網上圖片