唔知大家有無行過行人吊橋?係咪好刺激呢?葡萄牙呢條新啟用嘅516阿羅卡(Arouca)吊橋更加刺激,佢起於175米嘅高空,全長516米,係世界上最長嘅行人吊橋,據稱行完全程需要10分鐘咁耐!

耗資約230萬歐元(約港幣2144萬)、花兩年時間打造嘅516阿羅卡吊橋,由兩個V形嘅混凝土塔支撐,橋面同兩側欄杆都係由鐵格柵製成,等遊客可以飽覽周圍嘅景色。吊橋所在嘅阿羅卡地質公園,係獲聯合國教育科學文化組織認證嘅著名旅遊景點。吊橋下邊係獨木舟勝地派瓦河(River Paiva),附近仲有長8千米嘅派瓦走道(Paiva Walkways),非常適合邊行邊睇風景。

516阿羅卡吊橋自5月3號起正式開放俾所有遊客,而當地人喺4月尾就已經率先體驗過呢個新嘅「世界之最」。Hugo Xavier係最早體驗吊橋嘅人之一,佢形容行吊橋嗰陣「有點害怕,但真的很值得」,「這是非凡和獨特的體驗,有種腎上腺素激增的感覺」。當地人希望吊橋可以振興經濟,令阿羅卡走出疫情困境,市長Margarida Belém亦希望吊橋能夠吸引更多遊客到訪。

圖:中新網