隨住3D打印技術越來越成熟,宜家連樓都可以打印到出來。荷蘭一對退休夫婦最近就搬咗入歐洲第一間3D打印屋住,而荷蘭政府未來亦計劃興建更多3D打印屋。地產發展商聲稱,呢啲3D打印屋由無到有只需要5日! 

據外媒報道,呢間3D打印屋位於荷蘭南部嘅Eindhoven鎮上,佔地面積約996平方呎,入面有2間睡房。70歲嘅Elize Lutz同佢嘅67歲丈夫Harrie Dekkers以月租700英鎊(約港幣7390)租咗呢間屋,佢哋上個月30號收到一個應用程式,只要按下數碼鑰匙掣就可以開啟前門。Harrie表示喺3D打印屋入面用手機播音樂效果唔錯,當佢唔聽音樂嗰陣,亦好享受隔熱牆帶來嘅寧靜:「聽不見外面的任何聲音,感覺非常好。」

報道指,荷蘭政府規劃喺接落來嘅10年興建更多3D打印屋,以容納不斷增長嘅人口。致力研發3D打印嘅Eindhoven University of Technology教授Theo Salet認為,3D打印屋係趨勢:「能減少使用30%耗材,提高永續性。」佢指未來仲會將3D打印技術結合木頭或其他材料整成房屋。

圖:網上圖片