騙徒嘅手法層出不窮,有時真係令人防不勝防!內地浙江省嘉興市有個女子獨自去賓館想開間房,賓館老闆娘留意到佢神色可疑,態度十分慌張,一邊登記入住一邊講電話。老闆娘聽到女子嘅電話內容,懷疑佢受騙,當下即刻拒絕佢入住,最後成功避免女子跌入騙徒嘅陷阱入面,老闆娘嘅舉動獲得一眾網民狂讚。

事發喺22號下晝3點,陳姓老闆娘表示,有個女子想入住賓館,但佢嘅神色非常焦急,仲對住電話另一邊講:「好的,你放心,我已經找到賓館了」、「你放心,警官,我馬上就住進去了,等會就可以進行筆錄」。老闆娘即刻察覺事情有異,開口問女子發生咩事,但對方唔答佢,隻手仲不斷咁震。老闆娘懷疑佢可能遇到騙案,唔肯俾房卡女子,結果女子嬲到想走,老闆娘攔住佢之後即刻報警。老闆娘話:「寧可不賺她的錢,也不能給她開房間。」

警方到場調查發現,呢個女子係一名人妻,平時基本喺屋企照顧小朋友,點知當日中午佢接到個電話,一個自稱係警察嘅人要求佢獨自一人去賓館開間房「做筆錄」。女子表示:「他們做得太逼真了,不但有我個人資料,通緝令上還有我的照片」,幸好遇到熱心老闆娘先逃過一劫。

老闆娘嘅機智舉動獲得網民大讚:「這樣的多管閒事,忍不住要給讚」、「老闆娘果然見多識廣,女子很幸運」、「老闆娘:我見過的騙子比你吃過的米飯還多」。

圖:微博@央視新聞