為咗要吸引一班學生專心聽書,老師們上堂真係少啲心機都唔得!西班牙一位叫維羅妮卡嘅老師為咗令學生了解人體嘅器官位置,親自著上印有身體器官嘅特製緊身衣上陣,形象又生動咁教學生認識器官嘅形狀、位置。雖然有學生一開始覺得驚,但更多學生紛紛對呢件衫感到好奇。老師特別嘅教學方式引起廣泛討論,有網民指出老師應該係《進擊的巨人》粉絲。

老師為咗令生物課更有趣味,同埋加深學生對器官嘅了解,捨棄以往死記、模型教學嘅方法,用心自製一套人體器官服,仲親自著上身展示。佢表示:「對孩子直接簡單明瞭的說讓孩子記得更深刻,也讓孩子有自我保護的意識」,家長們大讚佢對教學有熱誠。有學生一開始見到呢件衫覺得有小小驚,指呢件衫「有些突兀」,但好多學生紛紛對呢件器官衫感到好奇:「原來腸子就是長這樣子」。

呢組圖片喺網上亦引起熱話,網民大讚:「蠻有創意的啊」、「真有心」、「這衣服不曉得怎麼搞,真的是挺實用的教具」。亦有網民笑指:「好像進擊的巨人」、「進擊的老師」、「應該是巨人粉」。

圖:Twitter@mikemoratinos