疫情雖然令人憂慮,但同時亦都加快科技發展。近日醫管局就加快步伐推動智慧醫院,加強5G技術運用,如將軍澳醫院喺疫情下以HoloLens混合實境及智能眼鏡進行共四次手術。

新界西醫院聯網麻醉科及手術室服務部顧問醫生林嘉雯表示,聯網將會於五月推行三項智慧科技的措施,包括人工智能聊天機械人,讓手術病者嘅家屬可以即時得知患者手術進度。全部措施會先喺天水圍醫院試行,由5月開始推行至少3個月,如效果良好,再推至聯網內嘅其他醫院。

根據博愛醫院數據顯示,一名當值12小時嘅護士平均會收到32次來自家屬「按鐘」詢問病人手術嘅進度,影響護士為病人進行護理。有見及此,天水圍醫院喺5月起率先試行人工智能聯天機械人,畀手術病者家屬可以即時得知患者手術進度。

林嘉雯又表示,程式會連結臨床管理資訊系統(CMS)及麻醉臨床資訊系統(ACIS),令家屬可以實時知道手術病者去到那一個階段。程式內亦會提供有關手術嘅資料及手術程序等,術後家屬亦可以於程式內與手術病者會面。又指,初步院方會提供二維碼供家屬登入網頁,效果良好的話,未來會將呢項技術加入HA GO 

另外,為減少樣本損失次數,院方亦會引入射頻識別臨床樣本追蹤系統,响天花板安裝天線,追蹤樣本去處。林嘉雯指,以往護士需要回覆檢查臨床樣本,平均每日需要用時超過20分鐘,每星期推算會浪費一名人手檢查樣本。若安裝射頻識別後,可以確保樣本準確無誤由手術室送到化驗室,「未來都希望可以繼績推展至人工關節,而最後一步就是掛在病人身上。」 

此外,院方亦會增設手術室協調中心,並配合HA CHAT通知醫生手術準備好,可以隨時到手術室進行手術,取代以往需醫護以打電話形式通知醫生。 

醫管局研討大會去年因疫情停辦,今年終於可以喺下周一及二(53-4日)响會展舉行,其中一個主題會講述公立醫院嘅新科技應用。研討大會程序委員會主席陸志聰醫生表示,因應疫情,已邀請感染控制專家喺現場評估,並由以往二至三千人參與,大幅減至不少於400人及保持適當座位距離,及不提供餐飲及不設展覽攤位,出入亦需量度體溫。局方亦於醫院設立近100個直播點予各院同事參與。

圖片來源︰醫院管理局