求職失敗難免令人唔開心,不過如果有禮物收,大家嘅心情會唔會好啲?日本有個女網民喺一間番茄醬公司筆試失敗後,居然收到公司送嚟嘅一箱「安慰獎」同一封感謝信,網民表示好感動,唔少網友亦紛紛大讚該公司嘅暖心行為。

呢名女網民最近喺社交平台發文分享自己搵工失敗後嘅經歷,佢指自己去一間以番茄醬聞名嘅公司應徵,點知喺筆試階段就被out走。網民原以為事情就咁結束,估唔到之後竟然收到一箱嚟自該公司嘅「安慰獎」同感謝信!呢封感謝信除咗表達對應徵者嘅感謝之外,仲特登準備咗煮漢堡排用嘅番茄醬汁同蔬菜果昔,希望可以慰勞網民。網民被該公司嘅暖心舉動感動,仲用呢隻番茄醬炮製美味菜式添。

文章至今已吸引超過16.1萬人讚好,唔少日本網友亦分享自己喺其他公司嘅類似經歷,直言呢種行為「太暖心」。

圖:Twitter@man__man__chan