喺馬路上揸快車容易發生意外,泰國一個爸爸就因為揸快車遇上交通意外,連累3歲嘅囝囝一齊受傷送院。囝囝自己帶傷亦不忘擔心爸爸嘅傷勢,仲勸爸爸以後唔好再開快車。

據泰國媒體報道,喀比府一名救護員女義工喺社交平台分享指,一對父子因交通意外要送到醫院救治,義工到場協助。由義工上傳嘅照片可見,爸爸受傷瞓喺擔架床上,而囝囝望落仲傷過爸爸,下身只著底褲,額頭同手臂都有擦傷流血。義工陪兩父子去醫院途中,囝囝不忘關心爸爸嘅傷勢:「爸爸痛嗎?哪裡痛?我也痛,流血了,但我還是很擔心爸爸。」爸爸話自己唔痛,但令囝囝受傷,覺得好對唔住佢。囝囝表示以後爸爸開車,佢都唔坐,更提醒爸爸:「爸爸,記住不要再開快車了。我受傷了,害怕流血。」愛子心切嘅爸爸梗係應承囝囝,義工亦被兩父子嘅對話感動。

義工嘅帖文引起網民關注,唔少人讚囝囝既勇敢又孝順,更多人指爸爸要汲取教訓:「下次發生車禍未必好彩,分分鐘性命不保……爸爸要引以為鑑」、「爸爸們經常開快車,太危險了,你還要載著孩子呢」、「請看看他們的故事,你還會讓孩子不戴頭盔嗎?」

圖:FB@Rattamanee Saynui