近年越來越多人注重健康,有唔少人建立咗跑步習慣,但就忽略咗跑姿重要性。

香港專業教育學院(IVE)有畢業生開發手機應用程式,用家影低跑步人士情况,程式就可以實時分析肩膀、手肘等擺動角度,繼而提出改善跑姿建議。有中學田徑隊已經試用咗應用程式,教練話有助為學生提供更準確建議,提升跑步表現。 

IVE人工智能及手機軟件開發高級文憑畢業生鍾緯誠平時有跑步習慣,發現唔少人因為跑姿有誤而受傷,有見及此佢就同同學以約1年時間開發程式,希望有助跑手改善跑姿。

程式名為「Performance Runner」,運用立體圖像識別技術及人工智能(AI)技術分析跑步影像,程式除咗可以就用家跑姿提出改善建議,仲可以儲存跑步片段畀用家重溫。 

長沙灣天主教英文中學田徑隊已經試用程式幾個月,領隊教師吳志偉表示,短跑速度快,憑肉眼觀察好難向同學提出準確嘅改善建議,加上有時指導學生「擺快啲」、「抬高啲」,學生未必領略到點樣改進。吳又說,程式有助分析學生跑步時每一步嘅表現,容易得知邊一步出錯,令學生跑步表現有進步外,亦能夠減少佢哋受傷及肌肉痠痛。 

圖片來源︰Unsplash@Steven Lelham