自閉症小朋友嘅脾氣往往比較難捉摸,亦因此會引嚟旁人側目,對家長造成困擾。英國有個叫Rudy嘅自閉症小朋友,佢因為扭計趴喺地下發脾氣,惹來旁人不滿,媽媽Natalie雖不斷向其他人道歉亦得唔到諒解。好彩有個路過嘅男人Ian伸出援手,趴喺地下同Rudy傾計,令Rudy嘅情緒慢慢平復。Natalie大讚Ian係自己嘅英雄,同時鼓勵大家遇到類似情況嗰陣,不妨嘗試主動了解,唔好事事批評。

據外媒報道,住喺英國Essex嘅44歲媽媽Natalie,早前帶住患有自閉症嘅5歲囝囝Rudy外出散步,但Rudy突然情緒失控大吵大鬧。Natalie解釋,Rudy好鐘意散步,但就係唔鐘意走回頭路。當日因為道路問題所以Natalie逼不得已要原路折返,Rudy亦因此趴喺地上發脾氣。經過嘅途人紛紛向佢哋投以唔友善嘅目光,更發出「嘖嘖」聲表達不滿。Natalie雖然已經不停道歉,但有對夫妻依然皺住眉並睥住佢哋,仲投訴Rudy嘅哭鬧聲影響到佢哋嘅小朋友瞓覺。

路過嘅男路人Ian目睹事件後,上前向Natalie了解情況,得知Rudy患有自閉症,情緒正處於低落狀態,Ian即刻二話不說就趴喺地上同Rudy傾計。可能覺得終於有人了解自己,Rudy好快平復情緒,仲拖住Ian隻手企返起身。Ian更陪住兩母子,送佢哋返回車上先離開。Ian嘅窩心舉動令Natalie十分感動,大讚對方係自己嘅英雄,「我們經常說,要建立一個友善和包容的世界,說是容易,要做其實很難。但Ian完全實現出來,我真的十分感激他。」

Natalie喺文末表示,唔識Rudy嘅人會以為佢曳,佢歡迎所有人過嚟同佢傾計,了解Rudy點解會有呢啲行為。但一般人通常喺未了解事件之前,就好快下定論。佢鼓勵大家遇到類似情況嗰陣,不妨先主動了解,唔好咁快就批評。

圖:FB@Better to be Different