今個禮拜四(15日)係「全民國家安全教育日」,不少學校舉辦咗相關學習活動,令學生更加認識國情!

路德會西門英才中學表示,「全民國家安全教育日」當日,早會會有升旗禮,並有一名「德育、國民及公民教育組」教師分享。助理校長陳耀輝表示,嗰位教師係「新香港人」,大約8年前由內地來港,將介紹內地國安教育及政治課教授嘅內容、對有關課程嘅感受等。陳又說,校方冀向學生多講解國情知識,惟「不會直接教要愛國」,學生唔一定要認同內地制度,但需要多認識。

另外,當日「國家安全教育中心」流動展覽車會到訪學校,介紹國家主席習近平提出嘅「總體國家安全觀」。 

鳳溪第一小學現正舉辦「國家安全衛士角色」及國安標語設計比賽,响「全民國家安全教育日」,校內會設展板簡介國家安全,亦有問答比賽畀學生參與。 

校長朱偉林表示,小學生可能會覺得國家安全同自身生活距離遠,故校方會以日常生活例子切入,如解釋倘學生愛護學校、家庭,就會想保持校舍及家居整潔、寧靜,再引伸至若學生愛惜社會,就唔應該有破壞行為。 

朱又說,《港區國安法》對小學生「無咁貼身」,故當日僅「輕輕帶一帶」法例內容,主要教授守法精神。

教育局為今年「全民國家安全教育日」,舉辦咗不少全港性嘅學生活動,包括「國家安全校園壁報設計比賽」同「2021全民國家安全教育日」網上問答比賽。局方表示,截至上周五(9日),超過90間中小學提交共200份壁報設計比賽作品,有超過400間中小學報名參加網上問答比賽,學界都積極參與。 

圖片來源︰FB@楊潤雄