台灣台鐵太魯閣號出軌意外造成多人受傷、身亡,慘劇發生後,台灣民眾紛紛前往救援。除咗醫生、救護、消防等一線救援人員外,台灣義務組織「76行者遺體美容修復團隊」亦有過百位遺體修復師,即刻前往災區修復罹難者嘅遺體,等佢哋可以完整、體面咁離去。另外,花蓮一班外賣員更主動放棄接單,自發收集物資送往現場,為救援人員打氣。

台灣義務組織「76行者遺體美容修復團隊」由遺體修復師陳修將創立,之前一直有幫助喺災難中離世嘅死者免費修復遺體,等罹難者可以有尊嚴咁離世。而今次太魯閣號出軌事故死傷慘重,組織入面嘅過百位遺體修復師,亦馬上趕往災區修復罹難者嘅遺體,同時亦希望可以修補罹難者家屬破碎嘅心。

另一方面,有網民喺facebook群組「希望中央全額補助花蓮543」上載多張相同影片,並發文表示:「感謝花蓮貓友大隊,犧牲上班時間……集物資一台台機車前進送進災區…衝啊」。從相片、影片可見,10幾位外賣員暫停接單,自發組團採購物資,之後駕駛電單車同貨車將物資運往災區。

圖:FB@76行者遺體修復團隊、希望中央全額補助花蓮543