每個人都會經歷生老病死,但不少人都會忌諱談及死亡,好少會一早決定埋身後事。

嶺南大學嘅研發團隊為促進可持續發展同推廣綠色殯葬,聯同社企「毋忘愛」合作,特製實用同環保並重嘅「傢俬棺材」。 

設計團隊指,書架平時用作放置書籍或擺設。若家中有人不幸離世,屋企人可以將書架改裝成棺材,日後用作安放遺體。並期望通過設計,取代只使用火葬傳統棺木,以嶄新方式保護環境,另外「傢俬棺材」對離世者家屬帶有一份親切感。

團隊設計嘅「傢俬棺材」,突破一般人對棺木嘅想像。「傢俬棺材」約長兩米、闊半米,原材料來自北歐森林嘅優質樺木同雲杉夾板。設計團隊指,物料符合環保同耐用等要求,按照本港對火化棺木嘅法定限制,即《火葬及紀念花園規例》(第132M章),既適合傳統火葬儀式使用,又期望促進可持續發展,推廣綠色殯葬。 

合辦設計項目嘅社企「毋忘愛」總幹事楊美蓉亦表示,希望藉設計「傢俬棺材」,鼓勵市民提前同家人作出臨終規劃,以達至「善終」及促進長幼共融嘅目標。又強調,預先計畫身後事對每個家庭都十分重要。

「傢俬棺材」設計項目獲嶺大「畢業生支援基金」資助,共招聘咗兩名嶺大學生參與。團隊透露會繼續同社企合作,希望培訓學生參與及組織更多推廣「傢俬棺材」活動同工作坊,教育公眾要提早準備臨終計畫。 

圖片及資料來源︰嶺大