街上不時有走失嘅老人家或小朋友,內地福建有位叫洪成木嘅外賣員就利用自己嘅職業之便,義務幫助27個走失者返屋企,令佢哋可以同家人團聚。因為洪成木嘅義舉,佢獲評為福建省第一批「最美快遞小哥」,亦被公司授予「最美藍騎士」榮譽稱號。

洪成木同好多外賣員一樣,每日都要忙碌接單、送單,平時工作繁忙無乜娛樂,最大愛好就係用手機睇下新聞。有一日佢喺手機見到一個尋人啟事,走失者著住一對特別鮮艷嘅人字拖,令佢印象深刻。結果當日喺送餐路上,洪成木見到一個著住新聞嗰對人字拖嘅年輕人,「就掉頭回來多看了他幾眼」,經對比後,佢發現年輕人正正就係尋人啟事裏面嘅走失人員,於是即刻報警。

就係呢次偶然嘅經歷,令洪成木意識到一份小小善意,或足以改變一個人嘅一生,影響一個家庭。於是,佢加入咗網絡尋人平台嘅義工團隊,獲得更多走失者嘅線索,認識一班志同道合嘅同伴。佢話,見到走失者同家人相擁嘅一刻,自己經常感動落淚,亦明白一切嘅努力都係值得嘅。

洪成木話:「我只是一個普通的外賣小哥,如果非要說有什麼尋人『超能力』,那可能就是觀察、溝通、聯繫三招吧。」佢喺尋人嘅過程中,亦總結咗一啲經驗。佢發現,大多數走失者係腦退化者、精神病患者、智力障礙者、離家出走同蕩失路嘅人等。當洪成木發現疑似走失嘅人,就會記低佢嘅外貌同衣著特徵,然後透過網上平台搜索尋人資訊,或者報警嚟幫助走失者。

圖:中新網