位於九龍城嘅樂善堂小學响1949年創立,有70年歷史,學校喺2019年停辦。而校舍並無荒廢,辦學團體九龍樂善堂以之推行樂屋項目,將其改建成過渡性社會房屋,讓51個基層家庭入住,改善居住環境。

辦學團體表示,改建時有保留小學嘅歷史痕跡。如寫有「仁、愛、勤、誠」嘅校徽、當年贊助擴建校舍嘅善長姓名嘅石碑臚,以及建於同治13年嘅龍津石製匾額。

九龍樂善堂總幹事劉愛詩指,校舍嘅建築標準同近年落成嘅新校相較甚遠,負責團隊需要因應每間房嘅情況改裝,好彩校舍課室及活動室多數設有大窗戶,光線充足,空氣流通,適合改裝成寓所。而採光不足嘅位置就改裝成洗衣房、圖書室、遊戲室同家庭輔導室等共享空間。

劉愛詩指,樂屋住客人均居住面積最少70呎。學校26間課室同活動室改建成51個面積260呎至420呎嘅單位,可分別供23人或45人家庭居住。為咗增設獨立浴室同廚房,負責團隊喺喉管方面下咗不少工夫。如响學校有蓋操場添置水泵、水缸、水管等;又為咗避免開放式廚房油煙同浴室水氣問題,每個單位都安裝咗通風口。而考慮到入住嘅小朋友需要玩樂空間,團隊亦保留咗寬敞嘅籃球場。

九龍樂善堂表示,入住樂屋嘅家庭需要符合兩個條件。其一係居住環境惡劣或急需社區支援,二係輪候公屋三年或以上,綜援家庭或收入低於家庭住戶每月收入中位數55%嘅家庭優先。 

樂屋租期不少於兩年。由於反應踴躍,九龍樂善堂已推出另一個位於宋皇臺道及土瓜灣道嘅樂屋項目,提供110個單位,並計劃推出其他項目,增加過渡性房屋嘅供應。

圖片及資料來源︰政府新聞網